Les loosers

Publié le par kurt cobain


تيتانيك22
Les loosers

طايح في الدّيزويت الرّاجل ...قلك خباثةّّّ متع كورة ...لا عجز يا بابا هذاك إسموه ة قلّة ثقة في النفس ...العملة هذيك ألعبها في تونس مع إنداتك ...مع الجماعة الي عندهم العقلية الخامجة الي ما إتوضل لحتى شيئ...فهت يا سي الحمار و إلا إنزيدك...أش مرجعك للسونطر باش إتكوفر؟؟؟ بلاسطك يا وليدي موش مع الصّحاح ...الأسطبل أولى بيكم. بمدربكم بمديركم بوزيركم بفلوسكم بكامل ما عندكم. شعب مهزوم ...من الكبير للصغير للي قاعد على الحصير ...جايين لألمانيا باش إكونو ...يشرو في الدبش و الجطايط و ثم حتى أشكون شفوه خارج يسهر يلقاش حوجة فاظلة في الشارع.  فريق الدكتاتورية إنهزم كما يجب أن تكون الهزيمة أما الفريق القومي التونسي الب نعرفو ...ما زال ما هبطش يلعب ...العقلية متع الحرية و الكرامة هي الي تصنع فريق كامل و متكامل أما فريق بن علي و بن طرابلسي و بن جعان ما تصنع كان فريق من الجواعة ...فريق ضعيف ما إيشرّفش الشعب التونسي ...أه يا كبدي !!!! علاش ما هبطوش الفريق القومي متع البنات ..أحسن من ها الخراديق ...المليح فيهم ما عندوش سادسة إبتدائي ...فيهمش واحد قرى ..للو و دمنة ...المتنبي ...الشابي و إلا حتى أرتيكل على تونزين ...حمير روسهم من الحشيش ما تخرجش ...كي سيدي ..كس جوادو ...عرفكم الكبير خربها و أنتم النار و أنا حطبها...لواه امروحين ...كملّو دبرو خدم في المانيا أغسلو السحون و سيقو الشوارع لأنداتكم ...الكورة ...أسهلشي من ها الّعبة هذه ..لا فيها لا مات لا فزيك ..لا فيها لابراطوارات ...لا تيبيات ...في هاشي حاجة ...جهدك يا علاف؟ و الجهد إيجيبو ربي ...فارغين ...ركايبهم فارغة الكل ...الناس حشاكم إتقولو ما يرقدو الليلة من حمى الحمى ...هاهي بيت القصيد حمى الحمى متع التجمع ولات النشيد الوطني اللّيلي و المحبذ للفريق الوطني....فسّخ و عاود ...و العواد في الدقيق الأحرش...و ما إنعاودو كان ما إنهزو ساقين الدكتاتورية و قتها تتحرر الرّكايب و تسّرح الرواري و يجري الدم في البدن و يتشحط الواحد فهمتي و إلا لا ...و بالحوت و الكبدة المشوية و زيت الزيتونة قادرين نعملو فريق متحرر من كل الضغوطات النفسية ...فريق من الجدّيين و من الناس الصحاح الي تلعب على المريول ...موش ما نلعب كان ما إتصبلولي الدّالـــــة و الأخر كان ما إتعرسولي و الأخر إشرولي قهوة ...و زيدوني خمسة سنين في الحكم باش إنكون للصغار ...الفريق الي ينهب في البلاد هو الخطر و هو الداء و هو السبب في كل الهزائم ...فريق التجوّع الي متركب من أرذل خلق الله على وجه الأرض ما أنجم كان إوصلنا للفينقة .....جراد حشاكم ...ما خلى شئ ما كلاهش ....لا أخضر و لا يابس ...ما هي كانت تسمى بمطمور روما تونس ؟ وينو المطمور ...؟ رحل !!! لا  كلوه الصحاح .

•   خطّف الطيارة يا كورتي ...لا نخطف انا
•   يا عرفي ...ما هو ما عندناش شوفير ....
•   خطف قوتلك يا صحوبة ...كان ما نسمعش حسّها إونون في راسي ..نمرض
•   حاضر ...كيفاش إخطفوها الطيارة يا صحوبة
•   حل الكتاب و أقرأ ...لازم عندها مفتاح ...
•   حاضر ...عرفي ...هاني داخل الكوكبيت ...باش إنشوف كيفاش الحكاية .

دخل المعّلم الجديد للكوكبيت ...و عارفو يلقالها حل ...و يلقى كيفاش إخطغها ...ما إشعلها كان هو ...الكتب ميجودة و الراس محلول ...المهم في المادة الشخمة ...الباقي الكلو يتعلمو الواحد ...كان الكورة ما نجمنهاش ...كان جيت نلعب في الفوت معاهم إنشوف كيفاش بالسّبتة نوريهم اللّعب ...الكورة إلتالي ما تمشيش ...ديمة إلى الأمام ..بالآزمة ألمانيا و البريزيل كما إطيحهم ما إبعظهم في إنهار واحد...الرّجال إيجيبها ربي ..شديت كرسي من تالي و خذتني عينــــــــــــــــتي...تاعب يا صحوبة ...تاعب إنب نرقد ...نرتاح ...من كل شيئ ...

و حب إدور بي النوم كي العباد ...أبدا ...نقرى في كل في كل شيئ و نعاود نقرى و إنزيد ...إنحب نفهم و نربط الخيوط الجديد ...ثم نصوص على تونسنيوز ...أصحابها نيتهم ما هيش صافية ...رشيد خشانة ...أش أيكون من التجمع ؟ ما يطلع كان جعان كيفهم الرّاجل داز فيها صحافي و حاب إقنبل على المعارضة ...النص متاعو الي إقول فيه الي ثمة توانسة أمشو للجزائر يترينو على السّلاح ...زعمة حقيقة و إلا الحكومة حابة تعمل كما عملت لأولاد جرجيس و تخلق إرهابين باش إتمرر المشاريع متاعها ضد المعارضة ...شس رشيد اسب روحو عمر الخيام ؟ بالحرام لا إتجيب منو شعرة كي تاقف على راسك ...و تونسنيوز حالة ساقيها و إتمدلو في التاي ...بالكاكوية زادة ...يا عن جد بو الصحافة المناضلة و النهار الأول الي خرجت فيه كلبة بنت الكلب ...حكينا ...فسرنا ...طبنا من التفسير و هوما شدين الصحيح باش من الباطل يرجعوه حق و ينشروه ...الجماعة الي من القصرين أمشو للجزائر جواعة مساكن ...فكتولهم أرضيهم و شردتوهم ...ما إلقو بها وين كان الجيران ...أشكون قال الي هوما مجرمين ؟ رشيد خشانة ؟ و إلا التجمع ...و إشكون كان السبب ما هو أرهاب الدولة و البطالة و الفقر و الجوع ...الشمال الغربي الناس الي تسكن فيه ما تملكش اراضي ...زوالة على أرض أجدادهم ...التجمع و المافية متاعو بيّعهم في أراضيهم ...يخدمو على الأرض متاعهم باش يكلو في بطونهم ...هذه هي العدالة الأجتماعية ...إشكون شراها الأراضي متع الشمال الغربي ...أعطونا تقيم للشيئ هاذا ...و علاش ما تعملوش دراسة و إتقولو الي القبيلة الحاكمة شرات الأراضي التونسية الكل باش تعدم كل الجهات ...بالطبع الناس هاذهم باش برحلو و يلقو حل لأرواحهم .

•   خطفت الطيارة ....خطفها صحوبة ...و عندها صوت و هدير ونوين
•   إسمع يا عرفي هاك الموتير ...تقّة ...تقّة ..إتقول منقالة ...و الله تحفة عندك
•   يا كورتي ...حس الطيارة و ريحة الكيروزان ..إتقولي سافر ...يا بابور...يا بابور.
•   إشنوه عرفي حاضر باش إتسوق ؟؟؟؟
•   و علاش لا ...عرفت إتخطفها ...معناتها قادر إطيرها ...أرجع للكوكبيت و أقرأ.
•   حاضر عرفي ...الي ساقها ما هوش خير مني ...عندك كان الرّجال
•   وحدك يا بوها ...جي كونفيونس ...أون توا....يا بوها...في زي

رجعت للكرسي الي كنت باش نرقد عليه ...مديت ساقية كي العادة و قلت : البلاد هذه وين ماشية ؟ زعمة إقوملها قيامة و الناس ما هيش عارفة كيفاش إتناضل ...شكشوكة ...كل مجموعة عاملة جمعية و إلا حزب و إلا مقال و إلا نشرية ...أما الصحيح مازال ما شفت شيئ ؟ و ها الطيارة الي تاكل في الكيروزان اش باش نعمل بيها ؟ علاش ها المخصير منتع الوقت و متع الخدمة و العصب ؟ هاهي الناس هزّت إيديها الكل و أنا أش نعمل مع راسي و الجمهورية الي ما غير علم و ما غير نشيد وطني و ما فيها كان العبدو لله و كورتي ..ما هو على الأقل لازمنا نبحثو على مواطنين ...!!!!! لجمهورية قاسم.....عملنا إشارات في كل بلاسطة على الشطوط الكل على الحدود الكل ...و كتبنا على الّوح : جمهورية قاسم من هنـــــــــــــــــــــا. إزح و لا واحد عرف الطرق متاعنا و إلتحق بينا ...شباب يمشي للبحر ...يحرق في بابور دامر و إخلي طيارة كي تيتانيك ...هذا العجب نفسو و البردوكس بعينو ...يا ناس يا جمعية البطالة الي أتشرشو على خدمة ...ما أسهل إنكم تلتحقو بالمجموعة الوطنية ...بالعربي بالمعارضة ..بالسوري بثمنطاش أكتوبر و تتبنو أش قالو و يتبنو الجماعة أش إتحبو ...أدخلو في المعارضة على سنة الله و الرّسول ...و أعطوها شوية نفس ...تيتانيك على حسابكم ...الطيارة خاطفة ......يا راس اللّحم ...

أول رسالة مشفرة لجمهورية قاسم
و الفهيم يفهم و جيبو المخابرات متع بن علي الكل

شوف كيفاش يا بوها ...ما تعمل شيئ ...حاجو وحدة طالبها ...الناس تلبس مراول مكتوب عليها بالحرف الكبير ( تونزيـــــــــــــــن) و دولر في وسط العاصمة ...على الشطوط ...ألبس فقط قميص ( تونزين ) ...التجمع و بن على و القبيلة الحاكمة راهم معقدين من حاجة إسمها حرية ...من حاجة إسمها لباس ...المختمرات الكل ...تلبس خمار أبيض مكتوب عليه ...جمهورية الحكيم ...أكتبو نواة ...أكتبو حتى تونسنيوز ...إنحبها إتولي ضاهرة الحكاية هذه...التّجمع خايف اليوم من كل شيئ ...التجمع في حالة تأهب قصوى ...ما هوش عارف الضربة منين باش إتجيه ...و الأقرب من الداخل ...باش يتكسر كما إتكسر الحزب الشيوعي السوفياتي ...باش إتكسرو المفرخة الصّغار .

أعلان واحد

أي تونسي و إلا تونسية إتحب تحرق ...تتصل بتونزين ...الطائرة جاهزة للأقلاع لبلاد الحرية و الكرامة و العدالة ...إقطعو تذاكركم بصفر ملّيم .......

•   بالله يا سي كورتي كيفاش يخدم هاك الرّاديو متع الطيارة ؟
•   إشنوه سي قاسم إتحب إتفزع الناس
•   لا عندي إسبوت بيبليسيتير ..نحبك تقراه في الرّاديو
•   أشبيك ...سي قاسم ...الراديو هذا ما عندوش بورتي طوبلة راهو يخدم على الموجات القصيرة ...لازمك واحد على الموجات الطويلة باش صوتك يسنعوه في بن قردان
•   بن قردان ...مل يحرق حد منهم ...هاذكم ما هومش كليبونات ...كلينات متع الترينو رقم حداش ...يحرقو على الساقين ...عينك ما رات العمي ...ليل و ما طولو و هوما يمشو ...عجاجة ...هاذوكم كان بالأسم توانسة ...خبزهم و حليبهم و معيزهم و لحكهم و دجاجهم من ليبيا ...أشبيك ...شوف حاجة توصل حتى لصفاقس و حتى للقصرين و إنت ماشي الفوق.
•   حاضر عرفي ...نصنعلك راديو ...و إنت حط الأنتان فوق الطيارة باش البث إكون مليح ...سيوعتين من الزمان الرّاديو إكون حاضر
•   إنت تأمر يا بابا و أنا باش نمشي إنحضر النص متاعي ...خدمة باهية مذيع ..و الله عندي صوت إشرقع ...خير من نجيب الخطاب في المونديال متع ثمنية و سبعين
•   أكرانيا يا عرفي إترشحت ؟ و البادن متاعنا يشرو في الكراهب و في الكلاسين متع الشط ...متع حطايط ...
•   بربي خليني ساكت و بالع السيكينة بدمها....وكلنهم العلوش و المناني ...قالك لا ما هوش قوي ...و ما يعمل الميسكل ...إيحبو ياكلو الخنزير باش إولو قوى كي الأمان ...الشكارة و البحر و ما عاش تجبدي على الكورة يرحم ولديك
•   حاضر عرفي ..كلمة لا على بنت الكلب ....توه إنشوف الراديو و إنقولك
•   باهي إخدم على روحك و خليني  أنا نمشي نكتب النص متاعي على راحتي ...كان ما إنخرجش الشعب التونسي الكل و إنجيبو للمطار أنا ما عاش نسمى قاسم ....يا مدير ...البرابكندا   ما دواها كان البرابقندا

Publié dans tunisie

Pour être informé des derniers articles, inscrivez vous :

Commenter cet article

wolfy 07/01/2007 08:58

J'ai rien compris !