شكشوكة

شكشوكة
إلــــــــــى كورتي

 Kacem
شوف يا كورتي الحكاية بدات تقراص كالخميرة. ثم شكشوكة في البلاد و ما عاد عارف حتى شيئ أنا. ما عاش عارف إشكون مع تونس و إشكون ضدها. إشكون إبيع و إشكون يشري ؟ السلعة نفسها ولات روبافيكة و ماك عارف يا بابا أش ماعناتها الروبفيكة: راهي دروق أبيض. فلوسها برشا و لكن الواحد يحقرها كي إشوفلها من بعيد و يتهزا عليها. حكاية المعارضة و السياسة في بلادنا بالظبط كي حكاية الروبافيكة ...ثم فلوس تدخل و تخرج و ثم ترنسبور في الحكاية و ثم جماعة تفلس و ثم جماعة إتفلّّس في جماعة أخرى. بالعربي الحكاية هذه يا صحوبة ما عاش عجبيتني و وليت نقرف وقت الي نقرى لبرشة بياعة. سلعة مظرحة و الكلّها ديشي لكن الأنبلاج متعها إبان باهي و تقبلو العين. يا صحوبة أنا بديت نكل في صباعي على الوقت الي ضيعتو من عمري و ما وصلنا إلى حتى شيئ إفرح. بياعت الروبافيكة الكبار خباث ياسر و كلاو كل شيئ...يا سيدي إلكلها على بعضها سلعة منيّكة و إنحب إنقولك يا صحوبة البلاد إشطرها إتباع و البقية الكل مرهونة عند القروسستية.
ربما باش إتقول الي عرفك بدى يتراجع ...أنعم أنا بصراحة بديت إنفد من كل شيئ و من القراية و من الكتيبة الي ما عطاطش مفعولها و ما نجمتش باش إتغير العقلية الخامجة الي عندنا الكل. يا صحوبة إتعبت من الفرز متع المعلومات و ما عاش نعرف شنوه الي يصلح و ما يصلحش و لذلك باش إنقص الحكاية جملة و تفصيلا لأني ما إنحبش لا إنبيع لا نشري الروبافيكة. ثم حاجة إكتشفتها في السفرات متعي الأخيرة في أوربا هو الي التونسي مازلت نيتو خايبة و ما إتعلمش النظال الصحيح و الصبر و عادلي و إنعديلك و بشوية بالشوية تتفرز الكريمة من اللّبن. ثم حاجة إنحب إنوضحالك أحنا قلوبنا معبيا بالحسد و النفاق ولذلك ما نعرفوش نمخضو الحليب باش إنتطلعو منو الزبدة. كل مرة باش نبدو من جديد في المخيض لازم يطلع واحد و غلا جماعة إشعلو النار تحت الحليب ...القراصة يقراص و الزبدة ما تطلعش و الي إفدد الحليب قادر باش إتبزع و إضيع كل شيئ للمرة الخمسين. يا سيدي الحكاية متع المعارضة و متع النظام راعي هي نفسها الثنين فاقدين الثيقة في أرواحهم و ما فلحين كان في التطبيل للبراني: إشكون إطبل أكثر و إشكون إهبط سروالو أكثر. ثم الطحين ياسر يا صحوبة الطحين متعنا ولا فايض علينا و شد البحر. يا صحوبة دورت البلاد من شمالها لجنوبها و شرقها لغربها ما شفوت في عيون الناس كان حاجة وحدة : الجوع ...الناس إتريش في بعضها الكل ...إيصلي و الا ما يصليش : العملية نفسية أكثر منها إقتصادية و إجتماعية. التونسي مريض بهزان الطحين بالطبالة وبالجوع ولو كان تعطيه جبل يكلو لازم إفكلك القدمة من إيديك. حاولت نفهم و نفهم روحي و لكن يا صحوبا من أشباه الرجال يستحيل باش تصنع صناديد و أبطال. جمهورية قاسم حاولت أن تصنع أبطال باش الناس إيحبوهم و لكن كل بطل يخفق لأنو الشخاص الي معاه ما نجموش أرواحهم و إلا جبدو بيه. تاريخنا معبا بالخيانات و بالدسائس. ما نجمناش نتخلصو من الهزيمة النفسية باش نصنعو الأنتصار للشعب التونسي. بالعكس من كتاب و من فنانين و من شعراء ولاو يصنعو من الأحمرة أبطال و من الكلاب أسود. سعات إنقول خصارة فينا الحشيش و خصارة فينا المطر و الهواء و الماء و قت الي ربي أعطانا عقل و لكن ما عرفناش كيفاش نستعملوه. العقل التونسي يا صحوبة إتبلد ياسر ظاربو مرض عضال في الوسط متاعو ألا وهو الحقد : في التراب و لا أولاد لقحاب: هذي هي الغناية التونسية و عذي عي العقلية السياسية الي يتصرف بها معارضة و نضام في نفس الوقت : الي باش يتعشى بيك إتغدى بيه : هذي هي القحبولوجية التونسية. يا صحوبة أنا تو عندي قرابة العشرين سنة إلبره خالظت ما خلطت من شعوب و من رادسات و ربما أنا ما عاش قاسم متع جمهورية قاسم الصغيرة : أكبرت على حاجات أخرى و تعلمت من شعوب العالم : العطاء و العطف و المحبة و الرحمة : الي ما إلقتاش عندنا ...يا صحوبة في الدول الي فيها الخير الناس ما تاكلشي بعضها كما عندنا: يا صحوبة : حوت ياكل حوت و قليل الجهد أموت : إنعم هذا الي قاعد صاير في بلادك كل يوم و كل ليلة. عندما فقدت الناس الثيقة في ارواحها و فقدت الثيقة في الحاكم و في الشيوخ متعها ..ولات على أرواحها و على تاريخ و سكت حتى في أصلها.
نرجعو لحكاية نور الهدى الي ولات تجبدنا في خرّافة عزيزتي زينب: الدكتورة تحكي على الأيكونتيتي و كأنا في تونس عندنا المشكلة هذه و ما نقصنا كان باش نعرفو أرواحنا أحنا شكون. السيدة الكريمة إتحب إترجعنا للعهد القبلي و إتزيد الويت على النار. طبة و ما قريناش الطب إنداوو بدويات عرب. وقت المثقف متعنا ما يعرفش إوصل حاجة للناس ديريكت يمشي يربش في أصلنا و زيد إشككنا في أروحنا كما الدكتورة نور الهدى. المرا هذيه تحكي من وازع و دافع قبلي لأنها ما تعرفش تتجاوز. الشيئ هذايا كان خطير و باش يبقى لأبد الأبدين خطير ياسر لأنو هو السبب في التخلف متاعنا. الولاء القبلي المغطى بالحظارة العربية الأسلامية عندها كذلك كان السبب في إنشقاق المعارضة اللكترونية في عديد المرات. الدكتورة حاسبة الناس الكل أعداء ليها و ما عيش فاهمه الي العدو متعنا هو الجهل و التخلف و عدم الثيقة في الناس و ما هيش عارفة الي أحنا قادرين باش إندورو الكورة كما إنحبو لكن في الوقت المناسب و في المكان المناسب. ثم مشكلة كبيرة ياسر عند التوناسة الي هي : الخفة : الفكر لازمو الرّزانة و التربص و الأنتظار و الخبرة الكافية كما الصياد. وقت الي تمشي باش تصطاد لازمك إتكون إمسلّح بالرزانة قبل المدفع. التونسي على ذبانة يخصر رصاصة لأنو معجول ...شوفتش في العالم ناس تاكل بالواقفة ...يا صحوبة الشيئ هاذا ما شفتو كان في تونس. اللقمة تتعدى في الطويل و ما تخوش وقتها للخزن باش تنفع. يا صحوبة ما نحكيلاكش كيفاش التونسي ياكل و ما يمظغش. الطبيبة الشيئ هذا ما تعرفوش و لذلك بدات تجبد في الحكايات الي قادرة إتبعبص كل شيئ و زيد على التخلويض فوضى أخرى. فوضى فوضى حتى النصر...ما يصلح بنا كان الشعار هذا باش ما إيصير شيئ. يا سيدي ما هو فرحنا بجماعة ثمنطاش و قلنا الحمد لله الي الجماعة إتفاهمو على السميق ديمقراطيك...هاك أتشوف كيفاش بدات البزوكة خدامة و طلعت بيانات ضد الحكاية. اش قال و أش قتلك الجماعة إشككو في الحكاية لأنو فيها الأسلامين...توه صواب هذا؟ أش نعملو بالأسلامين إنتطيشوهم في البحر و إلا نقتلوهم الكل؟ الجماعة هاذوما يمنو بارشة بالدموقراطية الدموية. شفت الطحين متع التوانسة ...ديمقراطي كان مع السلامين. توه كلام هذا مـــــوش شيئ إجنن؟ ما إهناش شوفت يا صحوبة كيفاش الكلاظ ناض وقت الي الجماعة جاو لباريس ....شنية الحكاية : قالك ما عندهومش الحق باش يتعملو مع دولة أجنبية ...صحيح و لكن الموقف هذا موش إثبت الدكتاتورية في بلاسطها؟ قالك الجماعة جاية إتبيع في البلاد بالعربي سمسارة بالضبط الجماعة إيحبو يعرضو سلعتهم و كأنهم طحانة في الحكاية. باهي الدكتاتورية أش قاعدة تعمل؟ ما هيش إمهبطة السروال في الشارع و أمام العالم أجمع...باهي معناتها حرام عليكم حلال علينا: شوفت القحب متع المعارضة و المدافعين على الدكتاتورية...تو أحنا مع شكون ...أنا و إياك قعدنا في الشايح. باهي إتصور الي جماعة ثمنطاش إتفاهمو في الحكاية باش مجموعة منهم يمشو لفرنسا و لسويسرا أش إكون موقف الجماعة الأخرين باش إقولو خونة و هذا هو منطق الديكتاتورية نفسها من المعارضة الكل. شوفت الطحين وين وصل بالتوانسة؟ ما يعرفوش مصلحتهم مع إشكون. باهي في الحالة الأخرى الي إكونو الجماعة الي جاو لفرنسا ما هومش متفاهمين مع الجماعة الي قعدو في تونس. في الحالة هذه الدكتاتورية تولي رابحة و جماعتها في الفروم و الي إخرجو في البيانات إولو طحانة ديكتاتورية و لكن الثابت يا بابا الي في الحكاية ثمة قميص عثمان. لأنو الجماعة الي قعدو في تونس يستحيل باش يظربو الجماعة الي مشاو لفرنسا فس ظهورهم.
ربما كان أجدر بجماعة ثمانطاش باش إكونو أكثر شفافية و أتكون الخطوات متعهم أكثر ثبات و اكثر دقة حتى ما يعطوش للكوازي الأخرين الفرصة باش إدخلو الفتنة و الشقاق..هذا رائي الخاص من اجل مصلحة البلاد.

برى هكاكة هاني جيتك ....ثمة جماعة في المعارضة وجودهم فلفل و شوك لأنهم فقراء علميا و فلسفيا و أدبيا و ما هم قادرين على حتى شيئ إنما بث الفوضى و التخلويض و ما إيجو حتى شيئ كان مهرجين : قالك أشنوه قالو شيوعين راديكاليبن ...يا سيدي قولهم قالكم قاسم بالحرف الواحد : برو إمشو رهزّو بعيد البلاد الي غتلوجو عليها ما هيش على الكورة الأرضية ...و يزي من التلكيز و التبلبيز.
قاسم

tunisie source www.tunezine.com