واصل الأضراب
ألي الشعب التونسي
إلي صديقي كورتي
واصل الأضراب ..... و صالح لن يصالح
ألي الدكتو خالد الطراولي السلام عليكم...واش ولات تعجبني الكتيبة بالدارجة !!! يا صحوبة يا كورتي ما إنشيخ و ما نتنفس كان ما نكتب بالعربي ...وليت مكينة متع كتيبة ...نمشي نكتب ...نرقد نكتب ...نقرى نكتب ..ليل وليت دكتيلو ...و قداش من مرة حبيت نكتب بالعربية الفصحى و لكن النص ما إحب يحضر كان بالدارجة ..و الله كان جاء مدير النشر موش صاحبي لما إقصولي إديه الزوز. برى عاد ما إحكيتلكش على عمك حمادي التونسي ...الشكل هاذا عندو عام إدور في أوربا و الناس الكل في عامها و لا واحد إتكلم و قال حويجة ...وقت الي قاسم كتب على الشيئ ما حب حد إرد و إلا أقول حاجة ...لا ؟ وقت الي حصل سي الطبيب و سي السماتي الجماعة فاقت و قالت ما جناش و ما ريناهش ...و ماك عارق قاسم ما يخفاه شيئ و إشمها قارصة على بعد عشرة ألاف كيليمتر ...وقت الي قاسم كتب الي عمك حمادي مافية متع غبرة ...الجماعة قتلك قاسم ما يفهمش و ما يعرفش الستراتيجيا و التكتيك و الدمغولوجيا متع المعارضة ...ما إهمناش المهم الجماعة فهمو اليوم الي الحكاية ماشية وباش إتزيد تقراص ...و أنا فاهم هحاجة أخرى جملة و تفصيلا ..و هاهو باش نكتبلك أش باش إيصير في الحلقة الجاية متع عمك حمادي التونسي. سي حمادي التونسي هاذا شخصية واقعية و كل تونسي إنجم إكون حمادي ماهي معروفة الحكاية التوانسية الكل إسمو في أرواحهم حمادي قدام اللّيبين...يا سيدي الشخصية هذه هي شخصية زبلة الي حكيتلك عليها في السروال الرابع. البوليس وقت الي ياقف في الشارع و يرشق مرافقو في أجنابو إحس بالضبط الي هو ولد زين العابدين بن علي ...لا جابت و لا قمتط زينب...راجل و ينكر في أصلو و في بوه و في أمو و يقول الي بونا و بو التوانسة الكل هو زين العابدين بن علي ...هاذا ما هوش راجل...و بالضبط إولي شخصية حمادي التونسي ...التونسي وقت الي يخدم في الحاكم و خاصة وزارة الداخلية إتصيرلو متامرفوز و إولي حاكم ...و قادر أولي رئيس جمهورية جملة وحدة ...و يعطي الأوامر من البيرو متعو في أقل قرية من قرى الجمهورية الثانية الصياصة. سي حمادي التونسي هاذا زبلة كما الزبل الكل ...الحاكم عطاه الفلوس و أتحرك بأسم الحاكم التونسي و كانت عندو مهمة كبيرة ألا و هي تشليك المعارضين و بث الفتنة فيهم ...أنجح و إلا لا؟ لا يا بابا ما إنجحش في السيرك الي عملو هو عرفو لأنو ثامة جماعة أكثر خبث و اكثر فن من القصر و من الداخلية. الحكومة الي باعثة زبلة لفرنسا و الي فك فلوس الراجل و عداها على برشة جماعة مساكن ما عادتش حكومة قادرة باش إدور أمور الشعب التونسي بل ولات كما كانت قبيلة داخلة مواضيع ما تفهمهاش ...بالضبط كما حمار حشاك إحب أصلح صاروخ ؟ الحكومة دخلت بعضها و ما عاش تعرف أشكون عندو الحل و أشكون معاها و إشكزن ضدها ...بالعربي محمص بالقديد و زاداتو زينب شويه فول وقت الي أتحب إتوكل الجماعة الكل ...شكشوكة كما قتلك و كما إكتبتلك ...اللوبيا بدات تحضر ...و الدالة هذه يا صحوبة باش إطيبها بالراس ...و تعرف راس شكون ....راس كبش كبر و فيه برشة دود. شوف كيفاش توه و إنحب أتحل عنيك و مخك و كان لزم إتحل الباب الي باش ندخولو منو لقلب النضام التونسي ...هاهو كيفاش باش إردو على سي الكنبان متع قرطاج بتكنبينه اخرى إتخرجو من اللعبة جملة و تفصيلا...شد عندك · جماعة ثمنطاش لازمهم أواصلو في نفس الطريق ...ديمه لا ..للي ما يفهوش باش إنوضلحلهم القانون متع فلسفة ثمانطاش : حركة ثمنطاش تخدم بقانون l’opposition de phase معناتها كلمة باهية على النضام لا؟ ديمة ضدو ...و الشيئ هاذا عطى نتيجة كبيرة لأن النضام و البرابكندا متاعو ماعادش إمسيطرين على الفضاء السياسي و في عدة مراة لقاو رواحهم إلبرى من الستاد...جابو المسكين إبسيس و ما نجمش روحو لأنو بهيم لا أكثر و لا اقل. بالعربي جماعة ثمناطش ربحو الفضاء الساسي الخارجي و لاكن ما نجموش أرواحهم من الداخل بالعربي لازم الصراع إدور حول الفضاء السياسي الداخلي. · الجماعة الجدد الي تو يتحركو و بما فيهم مجموعة ثمنطاش الجديد الي باش تتخلق في الأشهر القريبة الجاية لازمهم إدخلو معاهم جماعة من قلب النضام من داخل ...مثلا مديرين كبار في الحزب و إلا في الحكومة من تحت حس مس....الشيئ الي لازمك تقتنع به الي النضام هاذا ما يتكسر كان من الداخل ...معناتها عزل الفريق النضامي التابع للمافيا السياسية و القتصادية بدمج شخصيات متوسطة منــــــو ...بالعربي المعارضة لازمها تخدم على الجناح الصحيح متع شكشوكة التجمع و كان لزم باش إدخلو جماعة الحزب الأشتراكي القديم ...الجماعة هاذوما ما عاش عندهم حل أخر باش يدخلو الفضاء السياسي الخارجي إلا عبر المعارضة ...في الوقت هاذا المعارضة تدخل أوتوماتكيا للفضاء الساسي الداخلي ...هنا بابا سلامتك في التجمع و في بن علي و في الطرابلسي و في النضام القبلي ...الي ما عاد فيه باش أقاوم ...... · النهضة ولات عسل و سكر و تتاكل بالمغرفة ..تي الجماعة ولاو يمنو بالديمقراطية أكثر من جمهورية قاسم ...النهضة ما عاد إتخوف حد لا تونس و لا الشعب التونسي ...و الدمج متاعها كان أكبر هدية للشعب التونسي و أمكبر هدية لأبناء الحركة نفسها ...ثم خوانجية ملاح و صحاح و ووطنين بشكل غريب ..كيف كيف من داخل النضام ثمة ناس صحاح و وطنيبن و ملاح ...المعارضة لازمها تخدم أكثر و أكثر على الجناح البتهي متع جماعة الحاكم باش تقسم التجمع على زوز ...أتكون المعارضة طيارة ياسر كان تقسمو على ثلاثة باش ما عاش إيفيق كي كل الأحزاب الماركسية في الدول ألأشتراكية قديما · الشيئ هاذا لازمو يتكلفو به جماعة المصالحة متع الدكتور خالد الطراولي ...علاش جماعة المصالحة ...لأنو الجماعة الي في الحزب إيحبو ضمانات و الشيئ هاذا ما إنجمو كان الدكتو خالد الطراولي لأنو يتمتع حسب راي بقدرة كبيرة على إقناع الأخرين بالكيفية الي إيشوفها هو ...و هي المصالحة في مفهومها أعادة المشاريع الصحيحة على أرض الواقع. · التكتيك هذا ما يمنعش باش المعارضة الكل بكافة أطرافها باش إتواصل النضال متاعها كل حد من مكانو و كل حد في الخط الي رسمو من الأول ...الشيئ هاذا باش إوصل الروس الكل في الأخير باش يقعدو معا إبعضهم و يختارو واحد و يهبطو به على الساحة السياسة الداخلية كمرشح للرئاسة ...الهزيمة الي يلزمها إتكون لازمها إتكون هزيمة القمع و التراجيديا و مو ش هزيمة حزب و إلا فلان و إلا فلتان ...الأنتصار هو إنتصار الوطن لا أكثر....الشيئ هذا ما إنجم أكون كا عبر وسائل ديمقراطية و عبر إنتخبات شفافة ...لأنو الوقت جاء و الفضاء السياسي الداخلي و الخارجي أصبح في خدمة الشعب التونسي و ليس فس خدمة شخص معين أو حزب معين ....هنا يا صحوبة لازمك تفهم أن الشعوب الي قررت الرجال متاعها باش تنتصر على الضلم و على العشوائية و على الديكتاتورية هي الشعوب الي قادرة باش تبني مستقبل لأولادها. · ملاحظة طال أو قصر الزمن ...تونزين ستفتح من جديد ...و ستكون كما كانت و كما أراد صاحبها أن تكون ...ليست حلما و لكنها أصبحت هدفا لي كما إنتصاري ..بدونها أصبحت بدون بيت ...بدون اصبحت دون حب ...بدونها أصبحت دون زينب